جب رات کا عالم ہوتا ہے جب خواب میں خلقت ہوتی ہے

جب رات کا عالم ہوتا ہے جب خواب میں خلقت ہوتی ہے

پوچھو نہ تمہاری فرقت میں اس وقت جو حالت ہوتی ہے

یہ راز ہے یوںہی رہنے دو کیا چیز محبت ہوتی ہے

سب دل کا کرشمہ ہوتا ہے نظروں کی شرارت ہوتی ہے

آلام و مصائب کے بادل ہر سمت سے امڈے آتے ہیں

اک غم کے سوا معلوم نہیں کیا چیز محبت ہوتی ہے

شعلے پہ چراغ محفل کے یہ کہہ کے پتنگے ٹوٹ پڑے

اب دیکھنے والو دیکھو یوں تکمیل محبت ہوتی ہے

ہر ذرۂ خاکی نظروں میں صد رشک جناں بن جاتا ہے

تقدیر سے جب اک عاشق کو معراج محبت ہوتی ہے

وہ مشق ستم فرماتے ہیں لیکن یہ انہیں معلوم نہیں

جو عاشق صادق ہیں ان کو تکلیف بھی راحت ہوتی ہے

یہ راز مجھے پروانوں نے چپکے سے بتایا محفل میں

الفت میں رضیؔ جاں دے کر ہی تکمیل محبت ہوتی ہے