jab raat ka aalam hota hai jab KHwab mein KHilqat hoti hai

jab raat kā 'ālam hotā hai jab ḳhvāb meñ ḳhilqat hotī hai

pūchho na tumhārī furqat meñ us vaqt jo hālat hotī hai

ye raaz hai yūñhī rahne do kyā chiiz mohabbat hotī hai

sab dil kā karishma hotā hai nazroñ kī sharārat hotī hai

ālām-o-masā.ib ke bādal har samt se umDe aate haiñ

ik ġham ke sivā mā'lūm nahīñ kyā chiiz mohabbat hotī hai

sho'le pe charāġh-e-mahfil ke ye kah ke patange Tuut paḌe

ab dekhne vaalo dekho yuuñ takmīl-e-mohabbat hotī hai

har zarra-e-ḳhākī nazroñ meñ sad-rashk-e-jināñ ban jaatā hai

taqdīr se jab ik 'āshiq ko me'rāj-e-mohabbat hotī hai

vo mashq-e-sitam farmāte haiñ lekin ye unheñ mā'lūm nahīñ

jo ‘āshiq-e-sādiq haiñ un ko taklīf bhī rāhat hotī hai

ye raaz mujhe parvānoñ ne chupke se batāyā mahfil meñ

ulfat meñ 'razī' jaañ de kar hī takmīl-e-mohabbat hotī hai

jab raat ka 'alam hota hai jab KHwab mein KHilqat hoti hai

puchho na tumhaari furqat mein us waqt jo haalat hoti hai

ye raaz hai yunhi rahne do kya chiz mohabbat hoti hai

sab dil ka karishma hota hai nazron ki shararat hoti hai

aalam-o-masaib ke baadal har samt se umDe aate hain

ek gham ke siwa ma'lum nahin kya chiz mohabbat hoti hai

sho'le pe charagh-e-mahfil ke ye kah ke patange Tut paDe

ab dekhne walo dekho yun takmil-e-mohabbat hoti hai

har zarra-e-KHaki nazron mein sad-rashk-e-jinan ban jata hai

taqdir se jab ek 'ashiq ko me'raj-e-mohabbat hoti hai

wo mashq-e-sitam farmate hain lekin ye unhen ma'lum nahin

jo ‘ashiq-e-sadiq hain un ko taklif bhi rahat hoti hai

ye raaz mujhe parwanon ne chupke se bataya mahfil mein

ulfat mein 'razi' jaan de kar hi takmil-e-mohabbat hoti hai