jab raushnī na pā sake mehr-o-qamar se ham
ḳhud be-niyāz ho ga.e shām-o-sahar se ham
is imtihān meñ bhī hai terā karam sharīk
hañs kar guzar rahe haiñ rah-e-pur-ḳhatar se ham
duniyā ko ham dikhā.eñge me.ār-e-bandagī
qismat banā ke uTTheñge ab tere dar se ham
jis kī navāzishoñ pe hai mauqūf zindagī
kyā hogā gir ga.e agar us kī nazar se ham
zinda haiñ to banegā isī jā phir āshiyāñ
Darte nahīñ haiñ fitna-e-barq-o-sharar se ham
duniyā se duur ho ke patā us kā pā ga.e
varna the apne aap se bhī be-ḳhabar se ham
allāh rakkhe ḳhanda-e-dīvāngī se duur
haiñ āshnā ma.āl-e-ġham-e-mo'atabar se ham
'kashfī' banā diyā use ā.īna-e-bahār
guzre kisī kī yaad meñ jis rahguzar se ham
jab raushni na pa sake mehr-o-qamar se hum
KHud be-niyaz ho gae sham-o-sahar se hum
is imtihan mein bhi hai tera karam sharik
hans kar guzar rahe hain rah-e-pur-KHatar se hum
duniya ko hum dikhaenge mear-e-bandagi
qismat bana ke uTThenge ab tere dar se hum
jis ki nawazishon pe hai mauquf zindagi
kya hoga gir gae agar us ki nazar se hum
zinda hain to banega isi ja phir aashiyan
Darte nahin hain fitna-e-barq-o-sharar se hum
duniya se dur ho ke pata us ka pa gae
warna the apne aap se bhi be-KHabar se hum
allah rakkhe KHanda-e-diwangi se dur
hain aashna maal-e-gham-e-mo'atabar se hum
'kashfi' bana diya use aaina-e-bahaar
guzre kisi ki yaad mein jis rahguzar se hum
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.