jab saz ki lai badal gai thi

jab saaz kī lai badal ga.ī thī

vo raqs kī kaun sī ghaḌī thī

ab yaad nahīñ ki zindagī meñ

maiñ āḳhirī baar kab hañsī thī

jab kuchh bhī na thā yahāñ pe mā-qabl

duniyā kis chiiz se banī thī

muTThī meñ to rañg the hazāroñ

bas haath se ret bah rahī thī

hai aks to aa.ina kahāñ hai

tamsīl ye kis jahān kī thī

ham kis kī zabān bolte haiñ

gar zehn meñ baat dūsrī thī

tanhā hai agar azal se insāñ

ye bazm-e-kalām kyuuñ sajī thī

thā aag hī gar mirā muqaddar

kyuuñ ḳhaak meñ phir shifā rakhī thī

kyuuñ moḌ badal ga.ī kahānī

pahle se agar likhī huī thī

jab saz ki lai badal gai thi

wo raqs ki kaun si ghaDi thi

ab yaad nahin ki zindagi mein

main aaKHiri bar kab hansi thi

jab kuchh bhi na tha yahan pe ma-qabl

duniya kis chiz se bani thi

muTThi mein to rang the hazaron

bas hath se ret bah rahi thi

hai aks to aaina kahan hai

tamsil ye kis jahan ki thi

hum kis ki zaban bolte hain

gar zehn mein baat dusri thi

tanha hai agar azal se insan

ye bazm-e-kalam kyun saji thi

tha aag hi gar mera muqaddar

kyun KHak mein phir shifa rakhi thi

kyun moD badal gai kahani

pahle se agar likhi hui thi