jab sar-e-sham koi yaad machal jati hai

jab sar-e-shām koī yaad machal jaatī hai

dil ke vīrāne meñ ik sham.a sī jal jaatī hai

jab bhī aatā hai kabhī tark-e-tamannā kā ḳhayāl

le ke ik mauj kahīñ duur nikal jaatī hai

ye hai mai-ḳhāna yahāñ vaqt kā ehsās na kar

gardish-e-vaqt yahāñ jaam meñ Dhal jaatī hai

ḳhvāhish-e-zīst ġham-e-marg ġham-e-sūd-o-ziyāñ

zindagī chand khilaunoñ se bahal jaatī hai

jab vo hañste hue aate haiñ ḳhayāloñ meñ 'kalīm'

shām-e-ġham sub.h-e-masarrat meñ badal jaatī hai

jab sar-e-sham koi yaad machal jati hai

dil ke virane mein ek shama si jal jati hai

jab bhi aata hai kabhi tark-e-tamanna ka KHayal

le ke ek mauj kahin dur nikal jati hai

ye hai mai-KHana yahan waqt ka ehsas na kar

gardish-e-waqt yahan jam mein Dhal jati hai

KHwahish-e-zist gham-e-marg gham-e-sud-o-ziyan

zindagi chand khilaunon se bahal jati hai

jab wo hanste hue aate hain KHayalon mein 'kalim'

sham-e-gham subh-e-masarrat mein badal jati hai