jab se aabaad kiya qais ne virane ko

jab se ābād kiyā qais ne vīrāne ko

chheḌne aatī hai lailā tire dīvāne ko

pūchh sayyād na kuchh ruuh ke ghabrāne ko

qafas-e-tan se ye kahtī hai nikal jaane ko

dekh mastāna ghaTāoñ ko zarā ai saaqī

dosh par aaj sabā laatī hai maiḳhāne ko

hosh to gum the ga.ī sharm bhī rusvā.ī bhī

kaun hai ab jo sañbhāle tire dīvāne ko

daaġh aise diye yārān-e-vatan ne 'safdar'

jī nahīñ chāhtā ab sū-e-vatan jaane ko

jab se aabaad kiya qais ne virane ko

chheDne aati hai laila tere diwane ko

puchh sayyaad na kuchh ruh ke ghabrane ko

qafas-e-tan se ye kahti hai nikal jaane ko

dekh mastana ghaTaon ko zara ai saqi

dosh par aaj saba lati hai maiKHane ko

hosh to gum the gai sharm bhi ruswai bhi

kaun hai ab jo sanbhaale tere diwane ko

dagh aise diye yaran-e-watan ne 'safdar'

ji nahin chahta ab su-e-watan jaane ko