jab se apne ghar ke baam-o-dar se nikle hain

jab se apne ghar ke bām-o-dar se nikle haiñ

kaise kaise manzar pas-manzar se nikle haiñ

narm zamīñ aur paanī ke muhtāj nahīñ haiñ ham

ham to vo koñpal haiñ jo patthar se nikle haiñ

koī to apne jaisā apne andar hai maujūd

apnī zaat ke bāhar kis ke Dar se nikle haiñ

shor kī chādar ke pīchhe hai ḳhāmoshī kā raqs

sannāTe āvāzoñ ke paikar se nikle haiñ

kis se jañg laḌeñge kis ko fat.h kareñge ham

dushman ke hathiyār ḳhud apne ghar se nikle haiñ

nā-mānūs fazāoñ ko 'ashfāq' na do ilzām

ḳhauf ke jo bhī raste haiñ andar se nikle haiñ

jab se apne ghar ke baam-o-dar se nikle hain

kaise kaise manzar pas-manzar se nikle hain

narm zamin aur pani ke muhtaj nahin hain hum

hum to wo konpal hain jo patthar se nikle hain

koi to apne jaisa apne andar hai maujud

apni zat ke bahar kis ke Dar se nikle hain

shor ki chadar ke pichhe hai KHamoshi ka raqs

sannaTe aawazon ke paikar se nikle hain

kis se jang laDenge kis ko fath karenge hum

dushman ke hathiyar KHud apne ghar se nikle hain

na-manus fazaon ko 'ashfaq' na do ilzam

KHauf ke jo bhi raste hain andar se nikle hain