جب سے چمن میں اپنا ہوا آشیاں اداس

جب سے چمن میں اپنا ہوا آشیاں اداس

فصل بہار میں بھی رہا گلستاں اداس

بزم نشاط عیش و طرب کے مآل سے

ہونا تھا ہو رہا ہے دل شادماں اداس

اللہ رے یہ دور ترقی کا مد و جزر

ہے ارتقائے عقل سے سارا جہاں اداس

اک جام التفات کی خاطر اے ساقیا

تکتے رہے ہیں تیری طرف مے کشاں اداس

وہ کیا پیام زیست ہمیں دیں گے دوستو

جن کے خیال و فکر کہ ہے داستاں اداس

اوجھل نظر سے منزل مقصود دیکھ کر

اک میر کارواں سے ہوا کارواں اداس

ہو کر شریک بزم تو ہمدمؔ کبھی تھا خوش

اب جانے کیا ہوا ہے کہ وہ ہے یہاں اداس