jab se dekha hai bana gosh-e-qamar mein tinka

jab se dekhā hai banā gosh-e-qamar meñ tinkā

phāñs kī tarah khaTaktā hai jigar meñ tinkā

neza-bāzī pe hameñ apnī na dhamkā ai turk

ham samajhte haiñ ise apnī nazar meñ tinkā

ātish nāla-e-bulbul ye chaman meñ bhaḌkī

na bachā naam ko sayyād ke ghar meñ tinkā

ḳhār-e-mizhgāñ ko nazar bhar ke na dekhā maiñ ne

paḌ gayā uḌ ke mire dīda-e-tar meñ tinkā

sun ke aamad tirī āñkhoñ se uThā lete haiñ

dekhte haiñ jo paḌā rāhguzar meñ tinkā

gird us bahr-e-safā ke maiñ phirā kartā huuñ

rahtā hai gardī meñ jis tarah bhañvar meñ tinkā

āh-e-sozāñ ne jalā.e tire jangal 'sayyāh'

naam ko bhī na rahā ek shajar meñ tinkā

jab se dekha hai bana gosh-e-qamar mein tinka

phans ki tarah khaTakta hai jigar mein tinka

neza-bazi pe hamein apni na dhamka ai turk

hum samajhte hain ise apni nazar mein tinka

aatish nala-e-bulbul ye chaman mein bhaDki

na bacha nam ko sayyaad ke ghar mein tinka

KHar-e-mizhgan ko nazar bhar ke na dekha main ne

paD gaya uD ke mere dida-e-tar mein tinka

sun ke aamad teri aankhon se uTha lete hain

dekhte hain jo paDa rahguzar mein tinka

gird us bahr-e-safa ke main phira karta hun

rahta hai gardi mein jis tarah bhanwar mein tinka

aah-e-sozan ne jalae tere jangal 'sayyah'

nam ko bhi na raha ek shajar mein tinka