jab se hasil ho gai hai yar ki yari mujhe

jab se hāsil ho ga.ī hai yaar kī yaarī mujhe

zindagī lagne lagī hai jaan se pyārī mujhe

jab kabhī bhī gher legī koī lāchārī mujhe

phir to jiine bhī na degī merī ḳhuddārī mujhe

har qadam par saath maiñ detā rahā un kā magar

raas kuchh aa.ī na phir bhī ye vafādārī mujhe

jānte to sab hī the tū aadmī achchhā nahīñ

phir bhī to karnī paḌī terī taraf-dārī mujhe

baat sach hai sach kahūñgā har ghaḌī har moḌ par

laakh aa.e zindagī meñ chāhe dushvārī mujhe

rahmat-e-'ālam kī sunnat par 'amal hai is liye

chhū ke bhī jaatī nahīñ hai koī bīmārī mujhe

ab haqārat kī nazar se dekhtī hai zindagī

ḳhud kī nazroñ meñ girā degī ye nādārī mujhe

roz-o-shab maiñ ne lagā.e haiñ usī tā'līm par

tab kahīñ jā kar ye aa.ī hai qalam-kārī mujhe

pesh honā hai ḳhudā ke rū-barū roz-e-jazā

'umr-bhar karnī hai 'tāriq' us kī tayyārī mujhe

jab se hasil ho gai hai yar ki yari mujhe

zindagi lagne lagi hai jaan se pyari mujhe

jab kabhi bhi gher legi koi lachaari mujhe

phir to jine bhi na degi meri KHuddari mujhe

har qadam par sath main deta raha un ka magar

ras kuchh aai na phir bhi ye wafadari mujhe

jaante to sab hi the tu aadmi achchha nahin

phir bhi to karni paDi teri taraf-dari mujhe

baat sach hai sach kahunga har ghaDi har moD par

lakh aae zindagi mein chahe dushwari mujhe

rahmat-e-'alam ki sunnat par 'amal hai is liye

chhu ke bhi jati nahin hai koi bimari mujhe

ab haqarat ki nazar se dekhti hai zindagi

KHud ki nazron mein gira degi ye nadari mujhe

roz-o-shab main ne lagae hain usi ta'lim par

tab kahin ja kar ye aai hai qalam-kari mujhe

pesh hona hai KHuda ke ru-baru roz-e-jaza

'umr-bhar karni hai 'tariq' us ki tayyari mujhe