جب سے ہوئے جذبات کی فرہنگ سے واقف

جب سے ہوئے جذبات کی فرہنگ سے واقف

ہم لوگ ہیں ہر چہرے کے ہر رنگ سے واقف

کیا ان سے لڑائی میں مزہ آئے گا ہم کو

میدان میں آئے ہیں نہیں جنگ سے واقف

پھر بحث نہ کی ہم نے کبھی بھول کے ان سے

جب ہو گئے ذہنوں پہ لگے زنگ سے واقف

ہونٹوں پہ ہنسی دیکھ کے جو کھا گئے دھوکا

وہ لوگ نہیں درد کے اس رنگ سے واقف

سینے سے پہاڑوں کے نکل سکتی ہیں نہریں

ہو جائے گر انسان رگ سنگ سے واقف

رہتی ہے شکیلؔ اس کے ہی قابو میں یہ دنیا

ہوتا ہے جو دنیا کے ہر اک ڈھنگ سے واقف