jab se hue jazbaat ki farhang se waqif

jab se hue jazbāt kī farhang se vāqif

ham log haiñ har chehre ke har rang se vāqif

kyā un se laḌā.ī meñ maza aa.egā ham ko

maidān meñ aa.e haiñ nahīñ jang se vāqif

phir bahs na kī ham ne kabhī bhuul ke un se

jab ho ga.e zehnoñ pe lage zang se vāqif

hoñToñ pe hañsī dekh ke jo khā ga.e dhokā

vo log nahīñ dard ke is rang se vāqif

siine se pahāḌoñ ke nikal saktī haiñ nahreñ

ho jaa.e gar insān rag-e-sang se vāqif

rahtī hai 'shakīl' us ke hī qaabū meñ ye duniyā

hotā hai jo duniyā ke har ik Dhang se vāqif

jab se hue jazbaat ki farhang se waqif

hum log hain har chehre ke har rang se waqif

kya un se laDai mein maza aaega hum ko

maidan mein aae hain nahin jang se waqif

phir bahs na ki hum ne kabhi bhul ke un se

jab ho gae zehnon pe lage zang se waqif

honTon pe hansi dekh ke jo kha gae dhoka

wo log nahin dard ke is rang se waqif

sine se pahaDon ke nikal sakti hain nahren

ho jae gar insan rag-e-sang se waqif

rahti hai 'shakil' us ke hi qabu mein ye duniya

hota hai jo duniya ke har ek Dhang se waqif