جب سے خزاں کی زد میں ہے میرا چمن تمام

جب سے خزاں کی زد میں ہے میرا چمن تمام

اوجھل چمن سے ہو گئے گل پیرہن تمام

یاد آ گیا کسی کا بچھڑنا تو یوں لگا

ہو زخم زخم جیسے مرا تن بدن تمام

یہ کون تھا جو آیا ہنسا اور چلا گیا

تا دیر کھوئی کھوئی رہی انجمن تمام

کیا حرف و لفظ لوح و قلم کا بھرم رہے

ہیں قید اپنے خول میں ارباب فن تمام

داغ فراق تلخیٔ ایام کرب ذات

تیرے لئے قبول ہیں رنج و محن تمام

ہونے دیا نہ کم تری یادوں کا حوصلہ

چادر سمجھ کر اوڑھ رہی ہوں تھکن تمام

تیری ہی ذات ہے مرا موضوع شاعری

تجھ پر نثار دولت شعر و سخن تمام

آیا وفاؔ مرا گل رعنا چمن میں جب

قربان اس پہ ہو گئے سرو و سمن تمام