jab se KHizan ki zad mein hai mera chaman tamam

jab se ḳhizāñ kī zad meñ hai merā chaman tamām

ojhal chaman se ho ga.e gul-pairahan tamām

yaad aa gayā kisī kā bichhaḌnā to yuuñ lagā

ho zaḳhm zaḳhm jaise mirā tan badan tamām

ye kaun thā jo aaya hañsā aur chalā gayā

tā der khoī khoī rahī anjuman tamām

kyā harf-o-lafz lauh-o-qalam kā bharam rahe

haiñ qaid apne ḳhol meñ arbāb-e-fan tamām

dāġh-e-firāq talḳhī-e-ayyām karb-e-zāt

tere liye qubūl haiñ ranj-o-mehan tamām

hone diyā na kam tirī yādoñ kā hausla

chādar samajh kar oḌh rahī huuñ thakan tamām

terī hī zaat hai mirā mauzūa-e-shā.erī

tujh par nisār daulat-e-sher-o-suḳhan tamām

aaya 'vafā' mirā gul-e-ra.anā chaman meñ jab

qurbān us pe ho ga.e sarv-o-saman tamām

jab se KHizan ki zad mein hai mera chaman tamam

ojhal chaman se ho gae gul-pairahan tamam

yaad aa gaya kisi ka bichhaDna to yun laga

ho zaKHm zaKHm jaise mera tan badan tamam

ye kaun tha jo aaya hansa aur chala gaya

ta der khoi khoi rahi anjuman tamam

kya harf-o-lafz lauh-o-qalam ka bharam rahe

hain qaid apne KHol mein arbab-e-fan tamam

dagh-e-firaq talKHi-e-ayyam karb-e-zat

tere liye qubul hain ranj-o-mehan tamam

hone diya na kam teri yaadon ka hausla

chadar samajh kar oDh rahi hun thakan tamam

teri hi zat hai mera mauzua-e-shaeri

tujh par nisar daulat-e-sher-o-suKHan tamam

aaya 'wafa' mera gul-e-rana chaman mein jab

qurban us pe ho gae sarw-o-saman tamam