جب سے کسی کا درد ہمارے جگر میں ہے

جب سے کسی کا درد ہمارے جگر میں ہے

ہم کو سکوں سفر میں نہ آرام گھر میں ہے

شہ رگ سے بھی زیادہ خدا تو قریب ہے

پہچان پھر بھی تیری نہ اپنی نظر میں ہے

دل سے حساب لیتا ہوں ہر شب اسی لئے

محشر میں خوف کھانے کا منظر نظر میں ہے

خاک بشر کو خاک میں ملنا ضرور ہے

لیکن بقا کا راز فنا کے سفر میں ہے

دنیا میں خیر و شر کو سمجھنے کے واسطے

کچھ تو اشارہ گردش شام و سحر میں ہے

برسوں کے تجربے سے روشؔ یہ عیاں ہوا

سب کچھ خدا کا ہے جو مزاج بشر میں ہے