jab se kisi ka dard hamare jigar mein hai

jab se kisī kā dard hamāre jigar meñ hai

ham ko sukūñ safar meñ na ārām ghar meñ hai

shah-rag se bhī ziyāda ḳhudā to qarīb hai

pahchān phir bhī terī na apnī nazar meñ hai

dil se hisāb letā huuñ har shab isī liye

mahshar meñ ḳhauf khāne kā manzar nazar meñ hai

ḳhāk-e-bashar ko ḳhaak meñ milnā zarūr hai

lekin baqā kā raaz fanā ke safar meñ hai

duniyā meñ ḳhair-o-shar ko samajhne ke vāste

kuchh to ishāra gardish-e-shām-o-sahar meñ hai

barsoñ ke tajrabe se 'ravish' ye ayaañ huā

sab kuchh ḳhudā kā hai jo mizāj-e-bashar meñ hai

jab se kisi ka dard hamare jigar mein hai

hum ko sukun safar mein na aaram ghar mein hai

shah-rag se bhi ziyaada KHuda to qarib hai

pahchan phir bhi teri na apni nazar mein hai

dil se hisab leta hun har shab isi liye

mahshar mein KHauf khane ka manzar nazar mein hai

KHak-e-bashar ko KHak mein milna zarur hai

lekin baqa ka raaz fana ke safar mein hai

duniya mein KHair-o-shar ko samajhne ke waste

kuchh to ishaara gardish-e-sham-o-sahar mein hai

barson ke tajrabe se 'rawish' ye ayan hua

sab kuchh KHuda ka hai jo mizaj-e-bashar mein hai