jab se main KHud ko kho raha hun

jab se maiñ ḳhud ko kho rahā huuñ

karvaT badal ke so rahā huuñ

ye jāgnā aur sonā kyā hai

āñkhoñ meñ jahāñ samo rahā huuñ

duniyā se ulajh ke sar pe shāyad

apnī hī balā ko Dho rahā huuñ

ye laag aur lagāv kyā hai

apnā vujūd hī Dubo rahā huuñ

ab tak jo zindagī hai guzrī

kāñTe nafas meñ bo rahā huuñ

hai kuchh to apnī parda-dārī

na jāgtā huuñ na so rahā huuñ

itnā hai khoT mere man meñ

paanī meñ duudh bilo rahā huuñ

ai dil-figār be-sabāt hastī

terī hī jaan ko ro rahā huuñ

jitnī hai duur maut mujh se

itnā hī qarīb ho rahā huuñ

shīrāza yuuñ bikhar rahā hai

ḳhud meñ tabāh ho rahā huuñ

kis rāste par jā rahī hai duniyā

ye dekh ke hī to ro rahā huuñ

jaane 'hamesh' ḳhud ko kab se

be-vaj.h lahū meñ Dubo rahā huuñ

jab se main KHud ko kho raha hun

karwaT badal ke so raha hun

ye jagna aur sona kya hai

aankhon mein jahan samo raha hun

duniya se ulajh ke sar pe shayad

apni hi bala ko Dho raha hun

ye lag aur lagaw kya hai

apna wujud hi Dubo raha hun

ab tak jo zindagi hai guzri

kanTe nafas mein bo raha hun

hai kuchh to apni parda-dari

na jagta hun na so raha hun

itna hai khoT mere man mein

pani mein dudh bilo raha hun

ai dil-figar be-sabaat hasti

teri hi jaan ko ro raha hun

jitni hai dur maut mujh se

itna hi qarib ho raha hun

shiraaza yun bikhar raha hai

KHud mein tabah ho raha hun

kis raste par ja rahi hai duniya

ye dekh ke hi to ro raha hun

jaane 'hamesh' KHud ko kab se

be-wajh lahu mein Dubo raha hun