jab se mere bagh mein angur ke dane lage

jab se mere baaġh meñ añgūr ke daane lage

mujh ko duniyā meñ hī jannat ke maze aane lage

mai-kashoñ ne hī nahīñ DhūñDā mire ghar kā pata

shaiḳh sāhab bhī mujhe ab yaad farmāne lage

ik surūr-o-kaif kā aalam hai taarī bin piye

pyāle saade paanī ke bhī mai ke paimāne lage

jagmagā uTThe haiñ atrāf-o-javānib meñ diye

sham-e-mahfil kī pazīrā.ī meñ parvāne lage

mah-ruḳhoñ kī bazm meñ shirkat nazar aane lagī

aur tasavvur meñ dhanak ke rañg lahrāne lage

tā.eroñ kī chahchahāhaT se huā yuuñ dil gudāz

mere ham-mashrab mujhe naġhmoñ pe uksāne lage

ham pe ik mas.hūr-kun sī kaifiyat taarī huī

aur ham is kaifiyat meñ jhuum kar gaane lage

is tilism-e-rañg-o-bū ke sehr se nikle haiñ jab

ham ko aksar din meñ bhī taare nazar aane lage

jab se mere bagh mein angur ke dane lage

mujh ko duniya mein hi jannat ke maze aane lage

mai-kashon ne hi nahin DhunDa mere ghar ka pata

shaiKH sahab bhi mujhe ab yaad farmane lage

ek surur-o-kaif ka aalam hai tari bin piye

pyale sade pani ke bhi mai ke paimane lage

jagmaga uTThe hain atraf-o-jawanib mein diye

sham-e-mahfil ki pazirai mein parwane lage

mah-ruKHon ki bazm mein shirkat nazar aane lagi

aur tasawwur mein dhanak ke rang lahrane lage

taeron ki chahchahahaT se hua yun dil gudaz

mere ham-mashrab mujhe naghmon pe uksane lage

hum pe ek mashur-kun si kaifiyat tari hui

aur hum is kaifiyat mein jhum kar gane lage

is tilism-e-rang-o-bu ke sehr se nikle hain jab

hum ko aksar din mein bhi tare nazar aane lage