jab se na-danon ne KHud ko fani kahna chhoD diya

jab se nā-dānoñ ne ḳhud ko faanī kahnā chhoḌ diyā

ham ne apnī hairat ko hairānī kahnā chhoḌ diyā

dariyā terī 'azmat par bhī ye ilzām to aa.egā

āḳhir pyāse logoñ ne kyoñ paanī kahnā chhoḌ diyā

socho kitnī māyūsī kā mausam hai is bastī meñ

logoñ ne be-mā'nī ko be-mā'nī kahnā chhoḌ diyā

merā in tūfānoñ se to bas itnā sā jhagḌā hai

maiñ ne tez havāoñ ko tūfānī kahnā chhoḌ diyā

jin kī rā'nā.ī ke pīchhe sau-sau jhuuT kī parteñ haiñ

ham ne aise chehroñ ko nūrānī kahnā chhoḌ diyā

maanā us ne sabz fazā.eñ sahrā sahrā kar Dālīñ

tum ne kyoñ vīrānī ko vīrānī kahnā chhoḌ diyā

mere ġham kā shāyad tum ko is se kuchh andāza ho

maiñ ne us kī chūnar ko ab dhānī kahnā chhoḌ diyā

jab se na-danon ne KHud ko fani kahna chhoD diya

hum ne apni hairat ko hairani kahna chhoD diya

dariya teri 'azmat par bhi ye ilzam to aaega

aaKHir pyase logon ne kyon pani kahna chhoD diya

socho kitni mayusi ka mausam hai is basti mein

logon ne be-ma'ni ko be-ma'ni kahna chhoD diya

mera in tufanon se to bas itna sa jhagDa hai

main ne tez hawaon ko tufani kahna chhoD diya

jin ki ra'nai ke pichhe sau-sau jhuT ki parten hain

hum ne aise chehron ko nurani kahna chhoD diya

mana us ne sabz fazaen sahra sahra kar Dalin

tum ne kyon virani ko virani kahna chhoD diya

mere gham ka shayad tum ko is se kuchh andaza ho

main ne us ki chunar ko ab dhani kahna chhoD diya