jab se nazar se dur wo pyare chale gae

jab se nazar se duur vo pyāre chale ga.e

vo shaam vo sahar vo nazāre chale ga.e

rasm-e-vafā na pyaar kī pahlī sī riit hai

jaane kahāñ vo priit ke dhāre chale ga.e

ham khelte hī rah ga.e tūfān-o-mauj se

aa aa ke paas duur kināre chale ga.e

manzil kī dhun meñ raahī ne dekhā na ik nazar

dilkash maqām karte ishāre chale ga.e

ātish-fishāñ sā siina bhī ab sard ho gayā

sho.ale chale ga.e vo sharāre chale ga.e

suunā hai husn aur fazā.eñ udaas haiñ

mahfil se jab vo ishq ke maare chale ga.e

saudā nahīñ ye ishq kī baazī hai be-ḳhabar

jiite vahī jahāñ meñ jo haare chale ga.e

dair-o-haram se duur tire āstāñ se duur

ham rahguzar meñ raat guzāre chale ga.e

mahfil baḌhāo sham.a ko bhī gul karo ki ab

vo dost vo 'habīb' vo pyāre chale ga.e

jab se nazar se dur wo pyare chale gae

wo sham wo sahar wo nazare chale gae

rasm-e-wafa na pyar ki pahli si rit hai

jaane kahan wo prit ke dhaare chale gae

hum khelte hi rah gae tufan-o-mauj se

aa aa ke pas dur kinare chale gae

manzil ki dhun mein rahi ne dekha na ek nazar

dilkash maqam karte ishaare chale gae

aatish-fishan sa sina bhi ab sard ho gaya

shoale chale gae wo sharare chale gae

suna hai husn aur fazaen udas hain

mahfil se jab wo ishq ke mare chale gae

sauda nahin ye ishq ki bazi hai be-KHabar

jite wahi jahan mein jo haare chale gae

dair-o-haram se dur tere aastan se dur

hum rahguzar mein raat guzare chale gae

mahfil baDhao shama ko bhi gul karo ki ab

wo dost wo 'habib' wo pyare chale gae