jab se wo kah ke gae hain ki abhi aate hain

jab se vo kah ke ga.e haiñ ki abhī aate haiñ

koī aatā hai samajhtā huuñ vahī aate haiñ

barg-o-bār aate haiñ shāḳhoñ meñ gul-o-ġhuncha bhī

vo jab aate haiñ chaman meñ to sabhī aate haiñ

apnī qismat kā sitāra to nahīñ gardish meñ

na ḳhabar aatī hai un kī na vahī aate haiñ

ishq-e-sādiq ne jhukāyā sar-e-husn-e-maġhrūr

jin ko da.avā thā na aane kā vahī aate haiñ

ashk ban kar kabhī aate haiñ kabhī ban ke hañsī

ab mohabbat meñ bahar-shakl vahī aate haiñ

ab to ik bhiiḌ chalā kartī hai un ke ham-rāh

baat bhī kar nahīñ sakte jo kabhī aate haiñ

piine jaate haiñ sar-e-shām 'nazīr' ek buzurg

aur kuchh raat Dhale ban ke valī aate haiñ

jab se wo kah ke gae hain ki abhi aate hain

koi aata hai samajhta hun wahi aate hain

barg-o-bar aate hain shaKHon mein gul-o-ghuncha bhi

wo jab aate hain chaman mein to sabhi aate hain

apni qismat ka sitara to nahin gardish mein

na KHabar aati hai un ki na wahi aate hain

ishq-e-sadiq ne jhukaya sar-e-husn-e-maghrur

jin ko dawa tha na aane ka wahi aate hain

ashk ban kar kabhi aate hain kabhi ban ke hansi

ab mohabbat mein bahar-shakl wahi aate hain

ab to ek bhiD chala karti hai un ke ham-rah

baat bhi kar nahin sakte jo kabhi aate hain

pine jate hain sar-e-sham 'nazir' ek buzurg

aur kuchh raat Dhale ban ke wali aate hain