jab shahr-e-dil mein paD gae us zar-badan ke panw

jab shahr-e-dil meñ paḌ ga.e us zar-badan ke paañv

paḌte nahīñ zamīn pe ab is chaman ke paañv

vo kaun aaj rātoñ meñ ghar se nikal paḌā

uThne lage haiñ shahr kī samt aaj ban ke paañv

laao to dho duuñ ashk se vo paañv maiñ zarā

terī galī se aa.e haiñ us barhaman ke paañv

kahtā huuñ dil meñ aane ko aatā nahīñ hai vo

rakhtā nahīñ hai sil pe vo apne sanam ke paañv

aayā to dil meñ baiTh gayā ban ke devtā

uTThe nahīñ haiñ 'ishq-e-dil-e-but-shikan ke paañv

‘irfān-e-'ishq toḌ de zanjīr-e-fe’l ko

ruk jaa.eñ apne aap hī āvāgavan ke paañv

ab tak hai qalb-e-'shams' se raushan ye ḳhalq bas

ik baar paḌ ga.e the jo sho’la-badan ke paañv

saare tamaddunoñ kā hai ḳhatre meñ ab vajūd

thamte nahīñ haiñ par kabhī gang-o-jaman ke paañv

jab shahr-e-dil mein paD gae us zar-badan ke panw

paDte nahin zamin pe ab is chaman ke panw

wo kaun aaj raaton mein ghar se nikal paDa

uThne lage hain shahr ki samt aaj ban ke panw

lao to dho dun ashk se wo panw main zara

teri gali se aae hain us barhaman ke panw

kahta hun dil mein aane ko aata nahin hai wo

rakhta nahin hai sil pe wo apne sanam ke panw

aaya to dil mein baiTh gaya ban ke dewta

uTThe nahin hain 'ishq-e-dil-e-but-shikan ke panw

‘irfan-e-'ishq toD de zanjir-e-fe’l ko

ruk jaen apne aap hi aawagawan ke panw

ab tak hai qalb-e-'shams' se raushan ye KHalq bas

ek bar paD gae the jo sho’la-badan ke panw

sare tamaddunon ka hai KHatre mein ab wajud

thamte nahin hain par kabhi gang-o-jaman ke panw