jab sitaron ki rida kandhe se sarkati hai raat

jab sitāroñ kī ridā kāñdhe se sarkātī hai raat

chāñd ke siine se lag kar nuur ban jaatī hai raat

ḳhud taḌap kar kis qadar mujh ko bhī taḌpātī hai raat

ashk-e-shabnam jab mirī hālat pe barsātī hai raat

ḳhūn-e-dil de kar ufuq rañgīn kar jaatī hai raat

raushnī hone se pahle qatl ho jaatī hai raat

sub.h-e-nau se kis liye is darja ghabrātī hai raat

dekh kar ḳhurshīd ko jaane kidhar jaatī hai raat

tīrgī-e-hijr ko had se baḌhā jaatī hai raat

aap ke aane se pahle kyuuñ chalī aatī hai raat

maiñ nazar ban jā.ūñ to tasvīr ban jaatī hai raat

un kī yādoñ ke diye kī lau baḌhā jaatī hai raat

din guzar jaatā hai 'afshāñ' mahfil-e-ahbāb meñ

qasr-e-tanhā.ī meñ chupke se chalī aatī hai raat

jab sitaron ki rida kandhe se sarkati hai raat

chand ke sine se lag kar nur ban jati hai raat

KHud taDap kar kis qadar mujh ko bhi taDpati hai raat

ashk-e-shabnam jab meri haalat pe barsati hai raat

KHun-e-dil de kar ufuq rangin kar jati hai raat

raushni hone se pahle qatl ho jati hai raat

subh-e-nau se kis liye is darja ghabraati hai raat

dekh kar KHurshid ko jaane kidhar jati hai raat

tirgi-e-hijr ko had se baDha jati hai raat

aap ke aane se pahle kyun chali aati hai raat

main nazar ban jaun to taswir ban jati hai raat

un ki yaadon ke diye ki lau baDha jati hai raat

din guzar jata hai 'afshan' mahfil-e-ahbab mein

qasr-e-tanhai mein chupke se chali aati hai raat