jab sulagti hai shab-e-gham meri tanhai se

jab sulagtī hai shab-e-ġham mirī tanhā.ī se

risne lagtā hai lahū chashm-e-tamannā.ī se

us ke is tarz-e-mohabbat pe hañsī aatī hai

pyaar bhī kartā hai Dartā bhī hai rusvā.ī se

zalzala sā koī aatā hai zamīn-e-dil par

ai merī jaan ke dushman tirī añgḌā.ī se

zehn-o-dil meñ kahīñ lailā to nahīñ hai lekin

qais vāqif hai mirī fitrat-e-sahrā.ī se

dil bhī māyūs-e-mohabbat kī tarah TuuT gayā

ab guzarnā hai use rāh-e-shikastā.ī se

kaT ga.ī hijr kī zanjīr faqat ik pal meñ

mere mahbūb tirī chashm-e-karishmā.ī se

aisā lagtā hai ki Takrā ke chalī aatī hai

merī har ek sadā arsh kī ūñchā.ī se

jab sulagti hai shab-e-gham meri tanhai se

risne lagta hai lahu chashm-e-tamannai se

us ke is tarz-e-mohabbat pe hansi aati hai

pyar bhi karta hai Darta bhi hai ruswai se

zalzala sa koi aata hai zamin-e-dil par

ai meri jaan ke dushman teri angDai se

zehn-o-dil mein kahin laila to nahin hai lekin

qais waqif hai meri fitrat-e-sahrai se

dil bhi mayus-e-mohabbat ki tarah TuT gaya

ab guzarna hai use rah-e-shikastai se

kaT gai hijr ki zanjir faqat ek pal mein

mere mahbub teri chashm-e-karishmai se

aisa lagta hai ki Takra ke chali aati hai

meri har ek sada arsh ki unchai se