جب سلگتی ہے شب غم مری تنہائی سے

جب سلگتی ہے شب غم مری تنہائی سے

رسنے لگتا ہے لہو چشم تمنائی سے

اس کے اس طرز محبت پہ ہنسی آتی ہے

پیار بھی کرتا ہے ڈرتا بھی ہے رسوائی سے

زلزلہ سا کوئی آتا ہے زمین دل پر

اے میری جان کے دشمن تری انگڑائی سے

ذہن و دل میں کہیں لیلیٰ تو نہیں ہے لیکن

قیس واقف ہے مری فطرت صحرائی سے

دل بھی مایوس محبت کی طرح ٹوٹ گیا

اب گزرنا ہے اسے راہ شکستائی سے

کٹ گئی ہجر کی زنجیر فقط اک پل میں

میرے محبوب تری چشم کرشمائی سے

ایسا لگتا ہے کہ ٹکرا کے چلی آتی ہے

میری ہر ایک سدا عرش کی اونچائی سے