jab suna usne ki pyasa mar gaya

jab sunā us ne ki pyāsā mar gayā

sharm se bastī kā chashma mar gayā

tere aate jī uThā thā ek shaḳhs

tere jaate hī dobāra mar gayā

is tarah roke hue thā saañs maiñ

dekhne vāloñ ne samjhā mar gayā

dost jis ko DhūñDte phirte haiñ ab

mere andar kā vo laḌkā mar gayā

is liye pahchāntā koī nahīñ

kam jiyā huuñ aur ziyāda mar gayā

jis kī ḳhushbū thī hamāre shahr meñ

gaañv kā vo phuul vaalā mar gayā

tere hisse kā abhī zinda huuñ maiñ

apne hisse kā to puurā mar gayā

ab tujhe piñjre meñ rakhā jā.egā

tere hāthoñ ik parinda mar gayā

vaqt hai ik rail-gāḌī kī tarah

jis ne rokā us kā rasta mar gayā

jab suna us ne ki pyasa mar gaya

sharm se basti ka chashma mar gaya

tere aate ji uTha tha ek shaKHs

tere jate hi dobara mar gaya

is tarah roke hue tha sans main

dekhne walon ne samjha mar gaya

dost jis ko DhunDte phirte hain ab

mere andar ka wo laDka mar gaya

is liye pahchanta koi nahin

kam jiya hun aur ziyaada mar gaya

jis ki KHushbu thi hamare shahr mein

ganw ka wo phul wala mar gaya

tere hisse ka abhi zinda hun main

apne hisse ka to pura mar gaya

ab tujhe pinjre mein rakha jaega

tere hathon ek parinda mar gaya

waqt hai ek rail-gaDi ki tarah

jis ne roka us ka rasta mar gaya