جب تک دل خوابیدہ بیدار نہیں ہوتا

جب تک دل خوابیدہ بیدار نہیں ہوتا

مے خوار حقیقت میں مے خوار نہیں ہوتا

جو چیز ہے دنیا کی اک خاص عطیہ ہے

قطرہ ہو کہ ذرہ ہو بے کار نہیں ہوتا

دیکھا ہے جنہیں وقف آداب غم جاناں

ان سے غم جاناں کا اظہار نہیں ہوتا

ہمدردیٔ عالم پر کیا ناز کرے کوئی

جب دل ہی محبت میں غم خوار نہیں ہوتا

تم شعر تو کہتے ہو یہ علم بھی ہے تم کو

دل سے نہ اگر نکلے تلوار نہیں ہوتا

انکار کا مطلب ہی اقرار محبت ہے

شاعرؔ لب جاناں پر اقرار نہیں ہوتا