jab tak KHalish-e-dard-e-KHuda-dad rahegi

jab tak ḳhalish-e-dard-e-ḳhudā-dād rahegī

duniyā dil-e-nāshād kī ābād rahegī

ruuh apnī hai begāna-e-har-jannat-o-dozaḳh

gum ho ke har ik qaid se āzād rahegī

jo ḳhaak kā putlā vahī sahrā kā bagūla

miTne pe bhī ik hastī-e-barbād rahegī

shaitān kā shaitān farishte kā farishta

insān kī ye bul-ajabī yaad rahegī

haañ vus.at-e-zanjīr tak āzād bhī huuñ maiñ

hastī mirī majmū'a-e-azdād rahegī

har shaam huī sub.h ko ik ḳhvāb-e-farāmosh

duniyā yahī duniyā hai to kyā yaad rahegī

shohra hai 'yagānā' tirī begāna-ravī kā

vallāh ye begāna-ravī yaad rahegī

jab tak KHalish-e-dard-e-KHuda-dad rahegi

duniya dil-e-nashad ki aabaad rahegi

ruh apni hai begana-e-har-jannat-o-dozaKH

gum ho ke har ek qaid se aazad rahegi

jo KHak ka putla wahi sahra ka bagula

miTne pe bhi ek hasti-e-barbaad rahegi

shaitan ka shaitan farishte ka farishta

insan ki ye bul-ajabi yaad rahegi

han wusat-e-zanjir tak aazad bhi hun main

hasti meri majmu'a-e-azdad rahegi

har sham hui subh ko ek KHwab-e-faramosh

duniya yahi duniya hai to kya yaad rahegi

shohra hai 'yagana' teri begana-rawi ka

wallah ye begana-rawi yaad rahegi