jab tak ki dil mein dard na paida kare koi

jab tak ki dil meñ dard na paidā kare koī

kāfir hai vo jo ishq kā da.avā kare koī

dil lūTnā hai kaam tirā ai hasīñ na dekh

royā kare balā se ki taḌpā kare koī

ham muntazir haiñ kab se tamannā-e-dīd ke

band-e-naqāb-e-husn magar vā kare koī

maanā ki vo vafā ke parastār haiñ magar

pās-e-yaqīñ jo ho to tamannā kare koī

vo muqtadī-e-ishq thā maiñ huuñ imām-e-ishq

hargiz na mujh se qais kā charchā kare koī

jab tak ki dil mein dard na paida kare koi

kafir hai wo jo ishq ka dawa kare koi

dil luTna hai kaam tera ai hasin na dekh

roya kare bala se ki taDpa kare koi

hum muntazir hain kab se tamanna-e-did ke

band-e-naqab-e-husn magar wa kare koi

mana ki wo wafa ke parastar hain magar

pas-e-yaqin jo ho to tamanna kare koi

wo muqtadi-e-ishq tha main hun imam-e-ishq

hargiz na mujh se qais ka charcha kare koi