jab tak ki KHub waqif-e-raaz-e-nihan na hun

jab tak ki ḳhuub vāqif-e-rāz-e-nihāñ na huuñ

maiñ to suḳhan meñ ishq ke bolūñ na haañ na huuñ

ḳhalvat meñ terī baar na jalvat meñ mujh ko haa.e

bāteñ jo dil meñ bhar rahī haiñ so kahāñ kahūñ

gaahe jo us kī yaad se ġhāfil ho ek dam

mujh ko dahan meñ apne lagī hai zabāñ zubūñ

shatt-e-amīq-e-ishq ko ye chāhtā huuñ maiñ

abr-e-mizha se ro ke use be-karāñ karūñ

tūfān-e-nūh aañkh na ham se milā sake

aatī nazar haiñ chashm se har pal ayaañ uyuuñ

nāseh ḳhayāl-e-ḳhām se kyā is se fā.eda

kab mere dil se ho havas-e-dil-barāñ barūñ

ye iḳhtilāt kījiye mauqūf nāsehā

ma.aqūl ya.anī dil use ai qadr-dāñ na duuñ

'inshā' karūñ jo pairvī-e-shaiḳh-o-barhaman

maiñ bhī unhoñ kī tarah se juuñ gumrahāñ rahūñ

ḳhalvat-sarā-e-dil meñ hai ho kar ke mo.atakif

baiThā huuñ kyā ġharaz kahīñ ai jāhilāñ hilūñ

jab tak ki KHub waqif-e-raaz-e-nihan na hun

main to suKHan mein ishq ke bolun na han na hun

KHalwat mein teri bar na jalwat mein mujh ko hae

baaten jo dil mein bhar rahi hain so kahan kahun

gahe jo us ki yaad se ghafil ho ek dam

mujh ko dahan mein apne lagi hai zaban zubun

shatt-e-amiq-e-ishq ko ye chahta hun main

abr-e-mizha se ro ke use be-karan karun

tufan-e-nuh aankh na hum se mila sake

aati nazar hain chashm se har pal ayan uyun

naseh KHayal-e-KHam se kya is se faeda

kab mere dil se ho hawas-e-dil-baran barun

ye iKHtilat kijiye mauquf naseha

maqul yani dil use ai qadr-dan na dun

'insha' karun jo pairwi-e-shaiKH-o-barhaman

main bhi unhon ki tarah se jun gumrahan rahun

KHalwat-sara-e-dil mein hai ho kar ke moatakif

baiTha hun kya gharaz kahin ai jahilan hilun