jab tak mujhe KHayal tere aastan ka tha

jab tak mujhe ḳhayāl tire āstāñ kā thā

rishta koī chaman se na ġham āshiyāñ kā thā

kuchh ḳhauf bāġhbāñ kā na barq-e-tapāñ kā thā

jab tak mirī nazar meñ samāñ gulsitāñ kā thā

dīdār-e-zul-jalāl pe āmāda ho gayā

kyā hausla nigāh-e-dil-e-nā-tavāñ kā thā

le kar kahāñ kahāñ phirā sail-e-junūñ mujhe

pahuñchī vahīñ pe ḳhaak Thikānā jahāñ kā thā

uTh kar chale to aa.e tirī bazm se magar

naqsha nazar ke sāmne haft-āsmāñ kā thā

turbat meñ bhī na sone diyā chain se mujhe

saaya mirī zamīn pe kis āsmāñ kā thā

ik chehra-e-karaḳht ne chauñkā diyā mujhe

dekhā jo ġhaur se to kisī mehrbāñ kā thā

kuchh soch kar jo 'shaiḳh' jī ḳhāmosh ho ga.e

samjhe sabhī qusūr usī be-zabāñ kā thā

jab tak mujhe KHayal tere aastan ka tha

rishta koi chaman se na gham aashiyan ka tha

kuchh KHauf baghban ka na barq-e-tapan ka tha

jab tak meri nazar mein saman gulsitan ka tha

didar-e-zul-jalal pe aamada ho gaya

kya hausla nigah-e-dil-e-na-tawan ka tha

le kar kahan kahan phira sail-e-junun mujhe

pahunchi wahin pe KHak Thikana jahan ka tha

uTh kar chale to aae teri bazm se magar

naqsha nazar ke samne haft-asman ka tha

turbat mein bhi na sone diya chain se mujhe

saya meri zamin pe kis aasman ka tha

ek chehra-e-karaKHt ne chaunka diya mujhe

dekha jo ghaur se to kisi mehrban ka tha

kuchh soch kar jo 'shaiKH' ji KHamosh ho gae

samjhe sabhi qusur usi be-zaban ka tha