jab tak mujhe nasib teri dosti rahi

jab tak mujhe nasīb tirī dostī rahī

har jāda-e-hayāt meñ ik dilkashī rahī

dil meñ tire ḳhayāl kī tābāniyoñ ke saath

dard-e-shab-e-firāq kī bhī tīrgī rahī

yuuñ to har ek ġhamza-o-ishva thā dil-fareb

lekin vo ik nigāh jo dil par jamī rahī

phir is ke ba.ad ho ga.ī tārīk rāh-e-zīst

jab tak tumhārā saath rahā raushnī rahī

saaqī tirī navāzish-e-paiham ke bāvajūd

mahsūs ye huā ki abhī tishnagī rahī

tum kyā ga.e ki zindagī be-kaif ho ga.ī

jab tak ki tum qarīb rahe be-ḳhudī rahī

thā ik hujūm-e-yās jo baḌhtā gayā 'nadīm'

mahrūm-e-imbisāt mirī zindagī rahī

jab tak mujhe nasib teri dosti rahi

har jada-e-hayat mein ek dilkashi rahi

dil mein tere KHayal ki tabaniyon ke sath

dard-e-shab-e-firaq ki bhi tirgi rahi

yun to har ek ghamza-o-ishwa tha dil-fareb

lekin wo ek nigah jo dil par jami rahi

phir is ke baad ho gai tarik rah-e-zist

jab tak tumhaara sath raha raushni rahi

saqi teri nawazish-e-paiham ke bawajud

mahsus ye hua ki abhi tishnagi rahi

tum kya gae ki zindagi be-kaif ho gai

jab tak ki tum qarib rahe be-KHudi rahi

tha ek hujum-e-yas jo baDhta gaya 'nadim'

mahrum-e-imbisat meri zindagi rahi