jab talak dar-pesh koi hadsa hota nahin

jab talak dar-pesh koī hādsa hotā nahīñ

zindagī kyā hai hameñ is kā pata hotā nahīñ

sīdhā rasta dekhne meñ yuuñ to hai āsāñ magar

jab chalo is par to ye āsān sā hotā nahīñ

sab ne pahnī haiñ qabā.eñ shahr bhar meñ ek sī

kaun kaisā hai yahāñ is kā pata hotā nahīñ

hai ye nā-mumkin nazar aa jaa.e jalva-gāh-e-nāz

sajda-gāh-e-āshiqāñ par naqsh-e-pā hotā nahīñ

ham na dekheñ ye alag sī baat hai lekin 'zafar'

kaun sī shai hai jahāñ vo rūnumā hotā nahīñ

jab talak dar-pesh koi hadsa hota nahin

zindagi kya hai hamein is ka pata hota nahin

sidha rasta dekhne mein yun to hai aasan magar

jab chalo is par to ye aasan sa hota nahin

sab ne pahni hain qabaen shahr bhar mein ek si

kaun kaisa hai yahan is ka pata hota nahin

hai ye na-mumkin nazar aa jae jalwa-gah-e-naz

sajda-gah-e-ashiqan par naqsh-e-pa hota nahin

hum na dekhen ye alag si baat hai lekin 'zafar'

kaun si shai hai jahan wo runuma hota nahin