جب تصور میں وہ آنے جانے لگے

جب تصور میں وہ آنے جانے لگے

دیپ پلکوں پہ ہم بھی جلانے لگے

جام آنکھوں سے جب وہ پلانے لگے

لوگ سنبھلے ہوئے لڑکھڑانے لگے

آج پھر مجھ کو ان کا خیال آ گیا

اشک آنکھوں میں پھر جھلملانے لگے

ہے وفائی نہیں ہے مرے خون میں

یہ سمجھنے میں ان کو زمانے لگے

بے غرض جو کسی سے ملے ہی نہیں

دوستی کے وہ معنی بتانے لگے

ہم تو اپنے مسائل میں الجھے رہے

چاند پر لوگ بستی بسانے لگے

یہ ہوا ہے اثر گردش وقت کا

ہم سے اپنے بھی نظریں چرانے لگے

ظلم دہشت کا وہ دور آیا کہ ہم

اپنے سائے سے بھی خوف کھانے لگے

عکسؔ رب کا یہ احسان ہم پر ہوا

طائر فکر ہم بھی اڑانے لگے