jab tasawwur mein wo aane-jaane lage

jab tasavvur meñ vo āne-jāne lage

diip palkoñ pe ham bhī jalāne lage

jaam āñkhoñ se jab vo pilāne lage

log sañbhle hue laḌkhaḌāne lage

aaj phir mujh ko un kā ḳhayāl aa gayā

ashk āñkhoñ meñ phir jhilmilāne lage

be-vafā.ī nahīñ hai mire ḳhuun meñ

ye samajhne meñ un ko zamāne lage

be-ġharaz jo kisī se mile hī nahīñ

dostī ke vo mā'nī batāne lage

ham to apne masā.il meñ uljhe rahe

chāñd par log bastī basāne lage

ye huā hai asar gardish-e-vaqt kā

ham se apne bhī nazreñ churāne lage

zulm dahshat kā vo daur aayā ki ham

apne saa.e se bhī ḳhauf khāne lage

'aks' rab kā ye ehsān ham par huā

tā.ir-e-fikr ham bhī uḌāne lage

jab tasawwur mein wo aane-jaane lage

dip palkon pe hum bhi jalane lage

jam aankhon se jab wo pilane lage

log sanbhle hue laDkhaDane lage

aaj phir mujh ko un ka KHayal aa gaya

ashk aankhon mein phir jhilmilane lage

be-wafai nahin hai mere KHun mein

ye samajhne mein un ko zamane lage

be-gharaz jo kisi se mile hi nahin

dosti ke wo ma'ni batane lage

hum to apne masail mein uljhe rahe

chand par log basti basane lage

ye hua hai asar gardish-e-waqt ka

hum se apne bhi nazren churane lage

zulm dahshat ka wo daur aaya ki hum

apne sae se bhi KHauf khane lage

'aks' rab ka ye ehsan hum par hua

tair-e-fikr hum bhi uDane lage