جب تیرے تصور سے تسلیم کہ شہہ پائی

جب تیرے تصور سے تسلیم کہ شہہ پائی

چپ چاپ رہا شاعر ڈستی رہی تنہائی

صد رنگ گلستاں ہیں رقصاں پس منظر میں

اللہ رے اس گل کی یہ انجمن آرائی

شاید تری یادوں سے کچھ اس کا تعلق ہے

اک آگ لگا بیٹھی یہ دور کی شہنائی

یہ عجز ہنر کب ہے اظہار حقیقت ہے

امکان سے آگے ہے ذرات کی پہنائی

شاعر کی عبادت ہے مہتاب کے مندر میں

تیرے بت سیمیں کے قدموں پہ جبیں سائی

قاضیؔ مرے سینے کی یہ آگ سلگتی سی

بھیگی ہوئی راتوں نے کچھ اور بھی بھڑکائی