جب تری بے گانگی کے غم سے گھبراتا ہوں میں

جب تری بے گانگی کے غم سے گھبراتا ہوں میں

مجھ کو سمجھاتا ہے دل اور دل کو سمجھاتا ہوں میں

شوق سے اے بے وفا تو اب منا جشن طرب

کہہ دیا جانے کو تو نے لے چلا جاتا ہوں میں

کس نے مجھ کو دے دیا آوارگی کا سلسلہ

کو بہ کو صحرا بہ صحرا ٹھوکریں کھاتا ہوں میں

مجھ سے پوچھو میں بتاؤں تلخیٔ کیف و نشاط

ساز غم پر اب ترانے پیار کے گاتا ہوں میں

چارہ گر تو جا تجھے دوں گا دعائیں عمر بھر

زخم رستے ہیں تو اک لذت نئی پاتا ہوں میں

ان کے غم کی پاسداری اب ہے فرض اولیں

ہر خوشی ان کی خوشی کے آگے ٹھکراتا ہوں میں

تجربے پچھلی بہاروں کے ہیں میرے سامنے

مسکراتا ہے جو کوئی پھول ڈر جاتا ہوں میں