jab teri begangi ke gham se ghabraata hun main

jab tirī begāngī ke ġham se ghabrātā huuñ maiñ

mujh ko samjhātā hai dil aur dil ko samjhātā huuñ maiñ

shauq se ai bevafā tū ab manā jashn-e-tarab

kah diyā jaane ko tū ne le chalā jaatā huuñ maiñ

kis ne mujh ko de diyā āvārgī kā silsila

kū-ba-kū sahrā-ba-sahrā Thokareñ khātā huuñ maiñ

mujh se pūchho maiñ batā.ūñ talḳhī-e-kaif-o-nashāt

sāz-e-ġham par ab tarāne pyaar ke gaatā huuñ maiñ

chārāgar tū jā tujhe dūñgā duā.eñ umr bhar

zaḳhm riste haiñ to ik lazzat na.ī paatā huuñ maiñ

un ke ġham kī pāsdārī ab hai farz-e-avvalīñ

har ḳhushī un kī ḳhushī ke aage Thukrātā huuñ maiñ

tajrabe pichhlī bahāroñ ke haiñ mere sāmne

muskurātā hai jo koī phuul Dar jaatā huuñ maiñ

jab teri begangi ke gham se ghabraata hun main

mujh ko samjhata hai dil aur dil ko samjhata hun main

shauq se ai bewafa tu ab mana jashn-e-tarab

kah diya jaane ko tu ne le chala jata hun main

kis ne mujh ko de diya aawargi ka silsila

ku-ba-ku sahra-ba-sahra Thokaren khata hun main

mujh se puchho main bataun talKHi-e-kaif-o-nashat

saz-e-gham par ab tarane pyar ke gata hun main

chaaragar tu ja tujhe dunga duaen umr bhar

zaKHm riste hain to ek lazzat nai pata hun main

un ke gham ki pasdari ab hai farz-e-awwalin

har KHushi un ki KHushi ke aage Thukraata hun main

tajrabe pichhli bahaaron ke hain mere samne

muskuraata hai jo koi phul Dar jata hun main