جب تہمتیں وہ مجھ پہ لگانے پہ آ گیا

جب تہمتیں وہ مجھ پہ لگانے پہ آ گیا

میں بھی اسے نظر سے گرانے پہ آ گیا

لہجہ بدل کے بات تو کرنا پڑی مگر

اس کا دماغ اپنے ٹھکانے پہ آ گیا

ان سر پھری ہواؤں کو ہوگی شکست فاش

میں گر چراغ اپنا جلانے پہ آ گیا

آواز جب نہ دب سکی میری کسی طرح

کم ظرف پھر وہ مجھ کو مٹانے پہ آ گیا

ان کی فنا تھا میرا ابھرتا ہوا وجود

میں اس لئے بھی سب کے نشانے پہ آ گیا

ہم کو مٹانے والے کبھی دیکھ آئنہ

تو خود تباہیوں کے دہانے پہ آ گیا

دشمن کو اپنے بے بس و مایوس دیکھ کر

میں خود ہی جا کے اس کے نشانے پہ آ گیا

اس نے فرازؔ جب کیا غیروں کا تذکرہ

پھر میں بھی اپنے شعر سنانے پہ آ گیا