jab tujhe yaad karen kar-e-jahan khenchta hai

jab tujhe yaad kareñ kār-e-jahāñ kheñchtā hai

aur phir ishq vahī koh-e-girāñ kheñchtā hai

kisī dushman kā koī tiir na pahuñchā mujh tak

dekhnā ab ke mirā dost kamāñ kheñchtā hai

ahd-e-fursat meñ kisī yār-e-guzishta kā ḳhayāl

jab bhī aatā hai to jaise rag-e-jāñ kheñchtā hai

dil ke TukḌoñ ko kahāñ joḌ sakā hai koī

phir bhī āvāza-e-ā.īna-girāñ kheñchtā hai

intihā ishq kī koī na havas kī koī

dekhnā ye hai ki had kaun kahāñ kheñchtā hai

khiñchte jaate haiñ rasan-basta ġhulāmoñ kī tarah

jis taraf qāfila-e-umr-e-ravāñ kheñchtā hai

ham to rahvār-e-zabūñ haiñ vo muqaddar kā savār

ḳhud hī mahmez kare ḳhud hī inaañ kheñchtā hai

rishta-e-teġh-o-gulū ab bhī salāmat hai 'farāz'

ab bhī maqtal kī taraf dil sā javāñ kheñchtā hai

jab tujhe yaad karen kar-e-jahan khenchta hai

aur phir ishq wahi koh-e-giran khenchta hai

kisi dushman ka koi tir na pahuncha mujh tak

dekhna ab ke mera dost kaman khenchta hai

ahd-e-fursat mein kisi yar-e-guzishta ka KHayal

jab bhi aata hai to jaise rag-e-jaan khenchta hai

dil ke TukDon ko kahan joD saka hai koi

phir bhi aawaza-e-aina-giran khenchta hai

intiha ishq ki koi na hawas ki koi

dekhna ye hai ki had kaun kahan khenchta hai

khinchte jate hain rasan-basta ghulamon ki tarah

jis taraf qafila-e-umr-e-rawan khenchta hai

hum to rahwar-e-zabun hain wo muqaddar ka sawar

KHud hi mahmez kare KHud hi inan khenchta hai

rishta-e-tegh-o-gulu ab bhi salamat hai 'faraaz'

ab bhi maqtal ki taraf dil sa jawan khenchta hai