jab tumhein dekha na tha aankhon mein kitne sae the

jab tumheñ dekhā na thā āñkhoñ meñ kitne saa.e the

maiñ usī din se akelā huuñ ki jab tum aa.e the

aag bhaḌkī jab to maiñ ye sochtā hī rah gayā

kāġhazī kapḌe mujhe kis vahm ne pahnā.e the

jaane kis ne ham ko sūraj se kiyā thā munharif

jaane kis ne dhuup meñ vo aa.ine chamkā.e the

āsmānoñ se huā thā nūr-o-nuz.hat kā nuzūl

ābshār ūñche pahāḌoñ se utar kar aa.e the

manzaroñ meñ thī mire husn-e-nazar se āb-o-tāb

pattharoñ ke dil mire ehsās ne dhaḌkā.e the

aas ke saa.e meñ ham sahte rahe kaisā 'azāb

aag thī qadmoñ-tale aur sar pe bādal chhā.e the

dhuup meñ phailā diye kyuuñ tum ne yādoñ ke gulāb

kyā isī din ke liye mujh se ye ḳhat likhvā.e the

jab tumhein dekha na tha aankhon mein kitne sae the

main usi din se akela hun ki jab tum aae the

aag bhaDki jab to main ye sochta hi rah gaya

kaghazi kapDe mujhe kis wahm ne pahnae the

jaane kis ne hum ko suraj se kiya tha munharif

jaane kis ne dhup mein wo aaine chamkae the

aasmanon se hua tha nur-o-nuzhat ka nuzul

aabshaar unche pahaDon se utar kar aae the

manzaron mein thi mere husn-e-nazar se aab-o-tab

pattharon ke dil mere ehsas ne dhaDkae the

aas ke sae mein hum sahte rahe kaisa 'azab

aag thi qadmon-tale aur sar pe baadal chhae the

dhup mein phaila diye kyun tum ne yaadon ke gulab

kya isi din ke liye mujh se ye KHat likhwae the