jab unhi ko na suna pae gham-e-jaan apna

jab unhī ko na sunā paa.e ġham-e-jāñ apnā

chup lagī aisī ki ḳhud ho ga.e zindāñ apnā

nā-rasā.ī kā bayābāñ hai ki irfāñ apnā

is jagah ahrman apnā hai na yazdāñ apnā

dam kī mohlat meñ hai tasḳhīr-e-mah-o-mehr kī dhun

saañs ik silsila-e-ḳhvāb-e-darḳhshāñ apnā

talab us kī hai ki jo sarhad-e-imkāñ meñ nahīñ

merī har raah meñ haa.il hai bayābāñ apnā

kaisī duurī usī shole kī hai zau merā jamāl

jis se tābinda rahā dīda-e-giryāñ apnā

armuġhāñ haiñ tirī chāhat ke shagufta lamhe

be-ḳhudī apnī shab apnī mah-e-tābāñ apnā

is tarah aks paḌā tere shafaq hoñToñ kā

sub.h-e-gulzār huā sīna-e-vīrāñ apnā

aisī ghaḌiyāñ ka.ī mujh aisoñ pe aa.ī hoñgī

vaqt ne jin se sajā rakkhā hai aivāñ apnā

jab unhi ko na suna pae gham-e-jaan apna

chup lagi aisi ki KHud ho gae zindan apna

na-rasai ka bayaban hai ki irfan apna

is jagah ahrman apna hai na yazdan apna

dam ki mohlat mein hai tasKHir-e-mah-o-mehr ki dhun

sans ek silsila-e-KHwab-e-darKHshan apna

talab us ki hai ki jo sarhad-e-imkan mein nahin

meri har rah mein hail hai bayaban apna

kaisi duri usi shole ki hai zau mera jamal

jis se tabinda raha dida-e-giryan apna

armughan hain teri chahat ke shagufta lamhe

be-KHudi apni shab apni mah-e-taban apna

is tarah aks paDa tere shafaq honTon ka

subh-e-gulzar hua sina-e-viran apna

aisi ghaDiyan kai mujh aison pe aai hongi

waqt ne jin se saja rakkha hai aiwan apna