jab uske hi milne se nakaam aaya

jab us ke hī milne se nākām aayā

to yā-rab ye dil merā kis kaam aayā

kabhī us taġhāful-manush kī taraf se

na qāsid na naama na paiġhām aayā

sad-afsos dam apnā niklā hai kis dam

ki jab ghar se ghar tak vo gulfām aayā

mujhe sub.h ko qatl kar vo masīhā

jo ghar apne farḳhanda farjām aayā

kisī ne mirī baat bhī vaañ na pūchhī

agarche har ik ḳhaas aur aam aayā

ġharaz phir usī ko jo yaad aa.ī merī

to ghabrā ke jis dam huī shaam aayā

jalāyā uThāyā gale se lagāyā

azīzo phir āḳhir vahī kaam aayā

ga.ī bevafā.ī 'nazīr' ab jahāñ se

vafā-dāriyoñ kā bhī hañgām aayā

jab us ke hi milne se nakaam aaya

to ya-rab ye dil mera kis kaam aaya

kabhi us taghaful-manush ki taraf se

na qasid na nama na paigham aaya

sad-afsos dam apna nikla hai kis dam

ki jab ghar se ghar tak wo gulfam aaya

mujhe subh ko qatl kar wo masiha

jo ghar apne farKHanda farjam aaya

kisi ne meri baat bhi wan na puchhi

agarche har ek KHas aur aam aaya

gharaz phir usi ko jo yaad aai meri

to ghabra ke jis dam hui sham aaya

jalaya uThaya gale se lagaya

azizo phir aaKHir wahi kaam aaya

gai bewafai 'nazir' ab jahan se

wafa-dariyon ka bhi hangam aaya