jab wo mere isbaat se inkar ko samjha

jab vo mire isbāt se inkār ko samjhā

tab hī to haqīqat meñ mire pyaar ko samjhā

jab ḳhatm tamāsha huā taalī to bajī ḳhuub

lekin na koī markazī kirdār ko samjhā

jis vaqt adālat ne barī kar diye qātil

tab zehn-e-rasā na.ara-e-dīvār ko samjhā

roTī bhī khilā.ī to mujhe kāsa-ba-kaf ne

baaqī na koī bhuuk kī guftār ko samjhā

ye rauñd ke aage hī chalī jaatī hai sab ko

gar aap ne duniyā kī na raftār ko samjhā

vo dūsrī duniyā kā makīñ ho gayā jā kar

jab tak ki masīhā mire bīmār ko samjhā

kar dī lab-o-ruḳhsār kī laalī nazar-andāz

tab jā ke kahīñ husn ke me.aar ko samjhā

dī daad bahut khul ke mujhe ahl-e-suḳhan ne

lekin na 'sabā' aap ke ash.ār ko samjhā

jab wo mere isbaat se inkar ko samjha

tab hi to haqiqat mein mere pyar ko samjha

jab KHatm tamasha hua tali to baji KHub

lekin na koi markazi kirdar ko samjha

jis waqt adalat ne bari kar diye qatil

tab zehn-e-rasa nara-e-diwar ko samjha

roTi bhi khilai to mujhe kasa-ba-kaf ne

baqi na koi bhuk ki guftar ko samjha

ye raund ke aage hi chali jati hai sab ko

gar aap ne duniya ki na raftar ko samjha

wo dusri duniya ka makin ho gaya ja kar

jab tak ki masiha mere bimar ko samjha

kar di lab-o-ruKHsar ki lali nazar-andaz

tab ja ke kahin husn ke mear ko samjha

di dad bahut khul ke mujhe ahl-e-suKHan ne

lekin na 'saba' aap ke ashaar ko samjha