jab wo patthar ho jate hain

jab vo patthar ho jaate haiñ

ham bhī aazar ho jaate haiñ

ashk samundar ho jaate haiñ

yā phir lashkar ho jaate haiñ

dard jab ehsāñ kar detā hai

lafz munavvar ho jaate haiñ

ḳhanjar tanhā rah jaatā hai

zaḳhm bahattar ho jaate haiñ

maiñ kuchh der jo chup rahtā huuñ

log suḳhnavar ho jaate haiñ

ek imārat ban jaatī hai

kitne be-ghar ho jaate haiñ

ḳhvāb nahīñ thakte haiñ maañ ke

girvī zevar ho jaate haiñ

shīshoñ se itnā mat khelo

shīshe ḳhanjar ho jaate haiñ

dil kā ḳhuun bahut hotā hai

sher to behtar ho jaate haiñ

jab wo patthar ho jate hain

hum bhi aazar ho jate hain

ashk samundar ho jate hain

ya phir lashkar ho jate hain

dard jab ehsan kar deta hai

lafz munawwar ho jate hain

KHanjar tanha rah jata hai

zaKHm bahattar ho jate hain

main kuchh der jo chup rahta hun

log suKHnawar ho jate hain

ek imarat ban jati hai

kitne be-ghar ho jate hain

KHwab nahin thakte hain man ke

girwi zewar ho jate hain

shishon se itna mat khelo

shishe KHanjar ho jate hain

dil ka KHun bahut hota hai

sher to behtar ho jate hain