جب وہ پتھر ہو جاتے ہیں

جب وہ پتھر ہو جاتے ہیں

ہم بھی آذر ہو جاتے ہیں

اشک سمندر ہو جاتے ہیں

یا پھر لشکر ہو جاتے ہیں

درد جب احساں کر دیتا ہے

لفظ منور ہو جاتے ہیں

خنجر تنہا رہ جاتا ہے

زخم بہتر ہو جاتے ہیں

میں کچھ دیر جو چپ رہتا ہوں

لوگ سخنور ہو جاتے ہیں

ایک عمارت بن جاتی ہے

کتنے بے گھر ہو جاتے ہیں

خواب نہیں تھکتے ہیں ماں کے

گروی زیور ہو جاتے ہیں

شیشوں سے اتنا مت کھیلو

شیشے خنجر ہو جاتے ہیں

دل کا خون بہت ہوتا ہے

شعر تو بہتر ہو جاتے ہیں