جب وہ صورت نظر نہیں آتی

جب وہ صورت نظر نہیں آتی

کب مری آنکھ بھر نہیں آتی

کوئےدل دار سے نسیم سحر

آتی ہے جب ادھر نہیں آتی

کیا ہوا سوز غم کہ اشکوں سے

بوئے داغ جگر نہیں آتی

حور سے کیا ملے گا دل واعظ

یاں طبیعت اگر نہیں آتی

موت کو بھی خبر نہیں شاید

کہ وہاں سے خبر نہیں آتی

زندگی یا تو ہے وبال کوئی

یا مجھی کو یہ کر نہیں آتی

شب ہجراں وہ شب ہے جس کے بعد

تا قیامت سحر نہیں آتی

شب فرقت کی داستاں ہے طویل

نیند المختصر نہیں آتی

ہے طبیعت تری رسا محرومؔ

تجھ کو اردو مگر نہیں آتی