jab zamir-o-zarf ke saude na the

jab zamīr-o-zarf ke saude na the

yuuñ sar-e-bāzār ham bikte na the

muflisī aañsū bahātī rah ga.ī

bhuuk thī bāzār thā paise na the

kuchh bharam rakhne ko rakhte rābta

go ki paimān-e-vafā sachche na the

kis meñ jur.at thī lagātā boliyāñ

ham kabhī bāzār meñ saste na the

vo uThāte kis liye dushvāriyāñ

mere ghar tak marmarīñ raste na the

vaqt ne kitnā badal Daalā mizāj

aaj ham jaise bhī haiñ aise na the

kuchh to hai 'ajmal' ḳhamoshī kā sabab

aap afsurda kabhī rahte na the

jab zamir-o-zarf ke saude na the

yun sar-e-bazar hum bikte na the

muflisi aansu bahati rah gai

bhuk thi bazar tha paise na the

kuchh bharam rakhne ko rakhte rabta

go ki paiman-e-wafa sachche na the

kis mein jurat thi lagata boliyan

hum kabhi bazar mein saste na the

wo uThate kis liye dushwariyan

mere ghar tak marmarin raste na the

waqt ne kitna badal Dala mizaj

aaj hum jaise bhi hain aise na the

kuchh to hai 'ajmal' KHamoshi ka sabab

aap afsurda kabhi rahte na the