جب ضمیر و ظرف کے سودے نہ تھے

جب ضمیر و ظرف کے سودے نہ تھے

یوں سر بازار ہم بکتے نہ تھے

مفلسی آنسو بہاتی رہ گئی

بھوک تھی بازار تھا پیسے نہ تھے

کچھ بھرم رکھنے کو رکھتے رابطہ

گو کہ پیمان وفا سچے نہ تھے

کس میں جرأت تھی لگاتا بولیاں

ہم کبھی بازار میں سستے نہ تھے

وہ اٹھاتے کس لیے دشواریاں

میرے گھر تک مرمریں رستے نہ تھے

وقت نے کتنا بدل ڈالا مزاج

ورنہ ہم پہلے کبھی ایسے نہ تھے

کچھ تو ہے اجملؔ خموشی کا سبب

آپ افسردہ کبھی رہتے نہ تھے