jab zara hui aahaT shaKH par hile patte

jab zarā huī aahaT shāḳh par hile patte

peḌ so ga.e lekin jāgte rahe patte

saikaḌoñ parindoñ ne oḌh lī ridā jaise

raat kī siyāhī meñ oT ban ga.e patte

surḳh ḳhuun shāḳhoñ kā hai vajūd meñ shāmil

dekh kar fazā lekin sabz ho ga.e patte

jaise un ke dāman par dhuul thī na dhabba thā

ik zarā sī bārish se kaise dhul ga.e patte

jab bhī lū chalī yaaro sabz rut badalne ko

tāliyāñ bajā.eñge phir yahī hare patte

jañgaloñ meñ ḳhāmoshī habs kī alāmat hai

tāzgī sī dete haiñ bolte hue patte

be-libās ho kar bhī peḌ to rahe qaa.em

hijratoñ ke mausam ne dar-ba-dar kiye patte

ab chaman kī rakhvālī mashġhala hai bachchoñ kā

phuul jab nahīñ paa.e nochne lage patte

jab zara hui aahaT shaKH par hile patte

peD so gae lekin jagte rahe patte

saikaDon parindon ne oDh li rida jaise

raat ki siyahi mein oT ban gae patte

surKH KHun shaKHon ka hai wajud mein shamil

dekh kar faza lekin sabz ho gae patte

jaise un ke daman par dhul thi na dhabba tha

ek zara si barish se kaise dhul gae patte

jab bhi lu chali yaro sabz rut badalne ko

taliyan bajaenge phir yahi hare patte

jangalon mein KHamoshi habs ki alamat hai

tazgi si dete hain bolte hue patte

be-libas ho kar bhi peD to rahe qaem

hijraton ke mausam ne dar-ba-dar kiye patte

ab chaman ki rakhwali mashghala hai bachchon ka

phul jab nahin pae nochne lage patte